宜蘭蠟藝彩繪館其實上次已經想去, 一心以為要等佢地再大多少少去先好玩, 所以原本今次係冇加蠟藝彩繪館入行程中, 直到去到台灣遇上37度高溫, 司機大哥建議我地唔好去幾米公園, 咁先轉左黎蠟藝彩繪館
入場費台幣200一位, 3歲以下免費, 即係話3歲以下唔會覺得好玩啦! 但事後証明我咁想係錯架, 唔止佢地兩個細既玩得開心, 我地大人都覺得好好玩, 同好抵去呀!!
一張門票係包5項DIY體驗, 第一項係拓印型版畫, 其實就係拎一張畫紙填色, 特別之處係有塊膠墊住黎畫, 所以佢地亂畫都出到好多印仔出黎, 好得意
填完色, 我地等去下一項之前既等待時間, 就瘋狂試畫白板筆, 對佢地黎講, 呢個仲好玩過畫畫紙呀, XDD
然後去整水筆, 由套筆頭, 筆心入顏色, 用木鎚敲關緊筆尾都係自己一手一腳整, 全程小朋友都可以自己做, 係用木鎚要小心D姐
仲有覺得好玩既係人體彩繪, 跟住枱面上既示範紙去畫, 連我都可以做畫家….誇左少少, 但最少認得出係咩黎先啦
仲有造型蠟筆, 揀顏色, 揀圖案到最後入袋帶返屋企都係阿女做晒!
玩完晒已經覺得好抵, 點知原來門票仲可以折抵消費100元! 哇哇哇, 實在太抵啦, 用兩張大人門票既200元去買已經買到一大桶蠟筆同一支人體彩繪蠟筆, 又食又拎咪呢D囉!!!
開放時間：8：30～17：00
地址：宜蘭縣蘇澳鎮德興六路７號（龍德工業區內）
