大阪一直都好受香港人歡迎，更加係中學生grad trip嘅首選。今次我就趁sem break去日本玩下，7日6夜嘅。今次呢個trip就相對輕鬆，絕對適合一尐唔想去旅行都咁chur嘅人。

Day 1 Hong Kong – Osaka 13/5

我地原本就係5月12號夜晚9點機嘅，但最後就delay到成3點先上機，去到大阪已經係朝早7,8點啦。

Kansai Airport – Namba

一落機我地就搭南海電鐵去左難波站先，我地就坐特急rapi:t 嘅，所以大約9個字就到難波啦。

***關西機場站 ⇔ 難波 ¥1,270

成晚都未食過野，一落機放低行李就梗係拿拿臨搵野食啦，由於太早，好多野都未開，所以我地就去食金龍啦。

由於今日真係太累啦，所以我地就係大阪周圍行下咁，影下相同埋食下野，夜晚就去左難波站嘅高島屋買下宵夜。大家如果想掃平貨嘅話記住7 8 點就要去到啦，你就會見到個尐壽司呀，天婦羅呀，生果呀個尐做緊減價，真係超級抵又高質。（嘻嘻我基本上每日都去掃平野，慳番唔少！）

Day 2 黑門市場 ＋ 心斎橋

黎到第二日我地就打算去黑門市場食好西。交通方面我地就行過去嘅，因為都唔算係好遠姐，老實講，其實呢到尐野都幾貴，但係個質素真心唔錯，個尐海鮮都幾fresh，生果又好甜，燒和牛同帶子都好好味道。仲有我最喜歡嘅toro（真係好好好好食），如果要黎呢到嘅預左會有尐迫同埋你個銀包會大出血啦！

Day 3 梅田

交通：JR難波 à 今宮 （轉大阪環狀線）à 大阪 （梅田）

到左梅田我地就首先去到佢地嘅 Grand Front Osaka 商場醫肚先。Grand Front Osaka 就分左南北二館嘅，十分之大，我地行左好耐決定食其中一間壽司鋪。相就無影啦，野食就唔係話超好食，但係就偏貴啦。

名稱：函太郎 大阪店

位置：Grand Front Osaka 南館 7F

醫飽個肚之後我地就係個商場入面行左一陣，順便買下手信咁。當然啦，黎到梅田就一定要睇下玩具架啦，好彩我及時制止住自己，如果唔係我都唔知番唔番到香港⋯⋯

名稱：玩具迷天堂 Kiddyland

Day 4 京都

一早起身就當然要醫下肚，我地就係民宿附近試左一間定食。呢個青魚定食都只係600Yen，條魚又大又香口，又有湯同豆腐，抵都爛。

食飽我地就起行去京都啦！

交通：JR難波 à 今宮 （轉大阪環狀線）à 大阪 à 京都

去到京都站一出就見到呢個塔啦！而且一出站又會見到好多巴士站，我地就係坐 100 號或者 206 號巴士上去清水寺啦，係清水道落車。

我地成個晏就就行左伏見稻荷大社，八坂神社，清水寺啦。不過因為我地留係下面太耐，好遲先上到去清水寺，所以我地最後就無入到去啦。如果想入清水寺玩，就記得早尐出發，又或者到步就去左先。係上清水寺嘅途中，兩邊都有好多商鋪，其中有一間係賣綠茶味嘅年輪蛋糕，我極度推薦大家買，因為真係好好食！

Day 5 奈良

交通：大阪難波 à近鐵電車 à 近鐵奈良

今日終於去到奈良睇鹿啦，去到可以比200yen買鹿餅餵比尐鹿食。講真其實佢地又真係幾可愛，不過就好鬼臭。

睇完鹿之後我地就去試左都幾出名嘅雞白湯拉麵。

行過另一邊仲會見到一個幾靚嘅湖。

Day 6 天保山海游館

交通：60號巴士 à 天保山Habor Village站 （難波個巴士站係北口對面）

我地朝早就去食左一間叫狸狸亭嘅餐廳，唔算貴，但幾好食同飽肚。

我地到左天保山就無玩個摩天輪（兩個男人玩乜鬼），直接就去左個海游館啦。呢個海游館唔算大，但都有唔少野睇，去到最尾仲有機會去摸下鯊魚同埋魔鬼魚。

夜晚我地仲食左一間串燒（鳥貴族道頓堀店），300yen一串，推薦大家去食！

Day 7 大阪城 ＋ Osaka à Hong Kong

朝早我地就去左中央市場到食endo sushi，大約1000yen一碟，每碟有5件，有4款比你揀，當然，你都可以散叫，但我極度推薦其中嘅toro，海膽，三文魚子同埋鰻魚。

跟住我地就去埋成個trip最後一個目的地啦 大阪城。

最後我地就番香港啦，成個trip都係用左5000多尐炸。

航班：Osaka/Kansai à HKG

#寫出你遊歷 #hutchgo資助旅費1000蚊