序言
黎親台灣唔係去台北行街掃夜市 就係去墾丁陽光與海灘
今次決定將眼界放到清境 除左景點隔攝可以避世之餘
更重要係可以見到台灣比較少可以接觸到既一面呀！
今程黎清境 除左係為左黎餵羊仔之外
仲挑戰埋凌晨上海拔三千幾尺既武嶺睇星空同日出
仲去埋小瑞士花園 真係當正自己去左歐洲一樣呀～
出發之前同大家上吓地理堂先XD
驟眼睇台灣地圖會見到清境好似近花蓮多d
但其實由花蓮去清境係全部陡峭山路 而且交通極唔方便
所以最後選擇坐飛機去台中再轉車上山了
Day 1 香港 – 清境
一到埗就係台中清泉崗機場喇
坐156號公車坐到尾就可以去到高鐵台中站
台中航空站-高鐵台中站交通
到高鐵站可以轉無縫接駁旅遊專車(~2.5hrs)
或者搭去埔里轉巴士上清境都得(~4hrs)
但由於上清境巴士好疏 所以大家一定要事先預準時間
如果唔係即時轉交通就好麻煩喇！
高鐵台中站-清境交通
埔里-清境交通
搖左好耐巴士～～到埗已經係傍晚嚕…
擺完行李到民宿即刻衝去到遊客中心附近
比錢報名參加合歡山觀星&日出團 但係要凌晨3點鐘出發
所以今晚一定要早d休息啦
報完名之後搭車上去小瑞士花園周邊搵野食填飽個肚
最重要係進餐消費可以免費拎到小瑞士花園入場門票 都幾抵食！
賣相不錯呢!
食完飯天色開始變得昏暗 當然要第一時間衝去小瑞士花園打個卡先啦
黃昏光線映照住滿佈大地既花海 都幾有瑞士花海既感覺架！
逛逛花園影完花海漸漸就天黑啦 場內燈飾亮燈之後又係另一景色呀
逛完小瑞士花園 就打道回府返民宿休養 準備下一日行程了！
Day 2 合歡山 – 清境農場
Zzz Zzz 聽到導遊哥哥morning call打黎提示車隊已經到民宿門口
就即刻換衫起行出門嚕 但因為係山上加上凌晨時份無太陽
就算係夏天 出門都只有10幾度 上到合歡山更加係得5度咋！
雖然導遊哥哥為我地準備左棉襖 但係上到山都真係凍到打晒冷震架！
沿途聽到導遊介紹清境山坡有幾陡峭 而且往山上海拔慢慢爬升
開始感受到溫度下降打晒冷震…
去到半路有片空地 導遊叫我地全體團友落車
當司機熄晒車燈 抬頭向上望到一片密密麻麻既星空 真係好震撼架！
而且導遊會用laser筆指向天上 成件事好似star wars既激光劍咁型
仲好記得睇到我地成班團友嘩嘩聲！然後佢就講解星空上面有咩星體
可惜智能手機影唔到整片星空 剩係影到最光既金星咋！
睇完星空就上返車 繼續坐上合歡山
到埗之後一踏出車外真係完全感受到寒風刺骨 打晒冷震！
我地一路打住冷震一路等日出 雖然好凍但係望住日出好治癒 抵返晒呀！
暮日初起 晨曦照亮大地
光照大地 留下美好印記
太陽出黎之後 瞬間變得溫暖～
當然唔少得打個卡啦 嘿！
然後再坐車上海拔三千幾尺既武嶺 果然山崚層巒疊嶂！
完成旅程之後就打道回府 返到民宿七點幾 岩岩好可以食早餐嚕！
望住呢個景食早餐 簡直係心曠神怡！
食完早餐就返房再訓多陣嚕Zzz……
訓醒已經係晏晝12點 我地又坐返車去小瑞士花園餐廳食飯
食物質素確實唔錯～
食飽之後再坐車上去清境農場 開展我地既重點行程-餵羊仔喇！(心心眼<3)
上到清境農場 岩岩好撞正佢地羊咩秀 表演剃羊毛同埋牧羊狗趕羊 都幾有趣架
睇完羊咩秀之後就可以出去買草餵羊仔嚕～
草原旁邊有d職員售賣一包包既草 可以拎黎餵羊仔引羊仔過黎架！
你睇吓果隻比人剃毛既羊仔幾可憐
都有毛茸茸既羊仔得意D
同羊仔玩完成日都好攰嚕～係時候落返山出去搵野食！
去左小瑞士花園廣場間紙箱王打邊爐 店內所有擺設容器都係用紙箱造出黎架
味道就麻麻 不過山上面食物選擇唔多 見天黑又凍返 打邊爐可以暖吓個胃呀
食飽飽就打道回府了！
Day 3 清境 – 香港
黎到最後一日 特登早起拍到晨曦
然後把握最後機會去小瑞士花園影日頭靚相～
睇埋最後既燦爛花海 就為呢個旅程畫上完美的句號了～
#寫出你遊歷 #hutchgo資助旅費1000蚊
