好彩上年11月去咗大阪、京都同奈良睇紅葉，今年9月頭嘅強颱風聽聞破壞咗好多個賞楓必到點。希望可以快d修整好啦！
去咗8日，京都3日，大阪3日，奈良1日。去到京都第一日就有少少後悔，因為秋天嘅京都實在太靚太好行了，完全可以規劃至少4-5日去賞楓。因為到咗11月，下午4點半就開始天黑，好多寺廟都五點就關，所以如果想完完整整行晒可以賞楓嘅地方，我當時嘅諗法係，應該留足8日囉！
第一日就去咗搭嵐山小火車。去之前見到好多人建議提前買飛，d賣飛嘅網好似搶演唱會飛咁，一日一日放d飛出嚟，無幾秒就搶晒，仲要貴成倍。原本都諗住搶埋一份，後來因為太忙，到我要去果個日子開賣嘅時候我完全唔記得咗，最後當然無買到。所以果日到嵐山，我就7點半就起身過去，諗住早d行睇多d，點知入到小火車站，竟然有飛買，雖然係企位同無窗嘅車廂，但影相相當方便，就係好凍好凍。
*嵐山小火車
*嵯峨野竹林之道
*嵐山渡月橋
晚餐超級值得推薦，鰻魚飯五星之外，d魚生非常新鮮有口感。下午4點半就已經開始排隊，想食可以睇準時間，五點前去排隊都唔會等太耐。（うなぎ屋廣川(鰻魚飯)：京都市右京区嵯峨天龍寺北造路町44-1）。
第二日都係腳斷嘅節奏，行咗東福寺、清水寺、八坂神社、祇園、花見小路、鴨川等等。
*東福寺，所有人踏入橋果下都“嘩”咗出嚟
在祇園見到好多黃色嘅杏仁樹，一個人去旅行就係可以隨意行行停停，周圍偷聽下d人係度傾咩，睇下每個國家嘅情侶去旅行嘅慘況…….有刻真係好想擔張凳仔係樹下食花生，一定好有趣。
原本諗住第三日起身就到大阪，實在太迷戀京都嘅秋葉，決定留到夜晚再過大阪，於是晨早起身plan咗一下，就去咗永観堂果一帶行咗大半日。
對住永観堂呢個景，聽住“呀呀呀”嘅烏鴉聲，即刻就想吟下詩：“枯藤老樹昏鴉，小橋流水人家，古道西風瘦馬，夕陽西下，斷腸人在天涯”。
一個人去旅行真係好容易諗到去邊就即刻出發、想坐係cafe 飲半日咖啡就死都唔會郁半步，全憑寶寶我心情同體力。日間仲行緊寺廟靜地，夜晚就飛上大阪嘅梅田空中庭園展望台睇夜景。
每到一個城市，我最愛就係到observation deck欣賞城市景。
第五日安排咗到奈良睇鹿仔，平常人都會買鹿餅喂鹿然後合照，我就係都唔喂，因為我知佢哋已經好飽啦，哈哈哈哈！我係咁影佢哋，佢哋係咁擰轉頭，仲有隻唄我～～～哇咔咔你醜到都幾可愛！
好多人係二月堂附近寫生。
然後係奈良公園車站附近食咗餐好好味嘅炸蠔炸豬扒。
玩咗幾日晨早起身超chur行程之後，係大阪就安排一日淨係食食食買買買，超級推薦去阪急百貨買手信，負一層全部都係好靚嘅日本零食同進口朱古力，其他層買大牌子護膚品同袋，如果匯率低過7都好抵。去機場前當然要安排幾個鐘係outlet買下野啦，但係認真唔算平，都係歐洲outlet抵d。
睇住呢個摩天輪結束今次賞楓之旅，都算完滿同滿足啦。
#寫出你遊歷 #hutchgo資助旅費1000蚊
