澳洲昆士蘭凱恩斯 正因為處於熱帶氣候地區 全年天氣適宜
加上因為處於大堡礁珊瑚群周邊 地理極具優勢 每年都有不少旅客慕名而來度假暢玩
而講到嚟凱恩斯旅行 一定要體驗空中跳傘同埋大堡礁深潛 因為 you only live once！
但係plan呢兩項極限運動行程之前 要先留意幾項重點：
－極限跳傘運動如果遇上惡劣天氣 包括大風落雨 都有可能會影響行程出發 所以要有技巧地選擇跳傘日期 預早睇天氣預報 避免選擇落雨天氣出發
－深潛方面 因為潛入水底會對耳膜造成壓力 甚至傷害 所以一般計劃行程都會建議深潛後18至24小時內避免進行高空活動 包括極限跳傘或乘坐飛機
－而深潛前就無規限避免高空活動 所以我就將跳傘行程計劃睇深潛活動前一日進行 咁就萬無一失啦
「極限跳傘體驗」
一般空中跳傘行程都要事先預約
我就係網上旅行社預約15000 ft高空一分鐘自由落體跳傘連攝影嘅行程 大約港幣$2500
行程包含往返市區酒店接送服務
出發當日 由凱恩斯市區酒店起行 坐大約1.5hr就到空中跳傘區
起行前 教練會事先同你一對一指導空中跳傘姿勢 同埋配戴安全裝置
然後就為我開始錄影起行嚕！
坐小型私人飛機起飛
15000ft即係相當於4500米高空 穿過幾層雲層 咁高都咪話唔驚呀！
終於跳出去了 係高空飛嘅感覺好自由好暢快！
從高空俯瞰大地
穿越雲層之後
附上教練自拍一張 哈
準備降落～
跳後感：
有好多人都好好奇跳傘會係咩感覺 自己跳傘前都會好緊張 不斷去預想個感覺
但可能因為風阻關係 原來跳出去頭幾秒就無晒離心力 個感覺仲弱過跳樓機添
反而因為萬五尺高空 一跳出去覺得好凍 同埋因為風好大 吹到個口好乾 好難合埋個咀
然後因為教練教我要做banana shape姿勢(即係俯頭曲腳 成個人呈拱橋形)
感覺到跳傘裝置壓住胸骨 透氣比較吃力 甚至乎透唔到氣添
同時因為急速下降 耳膜受到氣壓感到有少少陣痛 要呼氣平衡氣壓解決耳塞
經過一分鐘自由落體後 教練打開降落傘
因為教練控制左右 不時會轉圈都幾暈吓
同埋轉左轉右都會有急速下降 時不時都會有返離心力
準備著地時 教練會要求大力抱膝
然後著地時要雙腳向前 同脊柱呈90度
直到適當時機先可以站立 否則會傷到膝蓋架！
經過今次跳傘真係覺得不枉此行 終於完成bucket list其中一項人生體驗喇！
「大堡礁探索之旅」
琴日玩完極限跳傘 又點可以比佢停呀？
報跳傘團時加錢可以升級體驗埋大堡礁深浮潛之旅 梗係即刻狗衝啦！
同樣地 行程包含往返碼頭接送
除左浮潛之外 仲包含一次免費教練導覽深潛體驗
朝早7點出發 7點半就到碼頭集合報到了
遊艇相當豪華 露天甲板面積都好大
開船出發嚕
船上工作人員講解各自崗位之後 就安排換上潛水保暖衣 分發浮潛所需物資後 就可以出發去浮潛嚕！
雖然周圍都係珊瑚礁群 可惜水質唔算好清 水底影相無想像中咁靚 但係海洋世界真係一個迷人的秘境
上水之後見到廚師準備梗我地既午餐喇 聞到牛扒肉香味 真係流晒口水呀！
除左牛扒之外 仲有麵包同沙律自助餐
食飽之後 就到深潛時間喇 教練同我地講解深潛所需技巧 準備好就落水了！
因為水底吸光同折射導致色差 而我又無準備紅色filter 所以深潛水底影出黎既相都偏藍 🙁
不過潛入水底真係可以好近距離同海洋生物互動 同埋睇珊瑚礁
潛完水之後 返上甲板欣賞藍天白雲 海天一色
對住咁靚嘅景攤係度 先係真正嘅度假生活態度
「凱恩斯美食之旅」
兩日夾埋上天下海 完成兩項極限挑戰 點可以唔食好西好好獎勵自己呀？
嚟到澳洲當然要試吓當地野味 袋鼠肉同鱷魚肉啦！
聽落食野味好似好恐怖咁 但食落又真係有驚喜架！
食晚飯真係要推薦Esplanade大街嘅The Raw Prawn餐廳
價錢合理之餘仲有提供野味拼盤 同埋竟然有亞洲fusion菜 相當特別！
塔斯曼尼亞生蠔
生蠔當然係必試啦 雖然唔算肥美 但咬落散出淡淡海水鮮味 配上檸檬汁刺激味蕾 昇華生蠔嘅味道
澳式東坡肉(左) 西冷牛扒(右)
用自家調配嘅甜汁淋上東坡肉 咬落去係坑洲家鄉嘅味道啊
至於呢度嘅西冷牛扒 不過不失 都唔多作介紹了！
紅斑魚配甜蔥醬沙律
極度推介呢度嘅Red Emperor 魚肉口感香滑 表面微微焦香 配上甜蔥醬真係絕配
白咖哩椰汁海鮮飯
係東南亞菜嘅味道 係澳洲食到白咖哩椰汁做base嘅fusion菜都幾難得 而且佢serve嘅海鮮都幾豐富同新鮮 可以一試！
野味拼盤 (袋鼠肉 鱷魚肉 澳洲鱸魚)
最令我地期待嘅野味拼盤 袋鼠肉燒得剛剛好 食落非常嫩滑多汁
口感好似牛扒 甚至好食過同檯嘅牛扒添！
至於後面果塊鱷魚肉 口感就比較似橡膠質嘅雞胸 口感特別但就無咩味道
最後就係barramundi鱸魚 同檯嘅Red emperor已經完勝左
對比起上黎鱸魚就較遜色 食落有少許沙甸魚嘅味道 但口感無紅斑魚就滑啦！
整體而言呢間餐廳性價比都幾高 而且座無虛席 可想而知呢間係凱恩斯都係數一數二嘅海鮮餐廳黎架 所以大家下次經過Esplanade 不妨可以考慮試吓呢間呀！
#寫出你遊歷 #hutchgo資助旅費1000蚊
