一聽到曼谷呢個地方，你一定會諗起快閃同埋Shopping。但係，今次我去曼谷竟然無去shopping，而係去遊曼谷著名景點同埋尋覓一啲可以打卡嘅cafe～所以，我呢個行程應該同出面普遍嘅遊記好唔同！
飛到去曼谷，第一時間check in 完之後就call 車去食嘢！如果你想周圍玩，我建議你可以check 下曼谷有無BTS 或者 地鐵到到你想去嘅地方，因為日頭係會經常塞車。由曼谷市中心搭的士去我嘅第一站 pooltime cafe，大概用咗20分鐘多啲。
呢間cafe 其實有咩特別呢？呢度二樓有浣熊，可以參觀同埋玩。比100 泰幣比你同浣熊近距離接觸15分鐘。呢間cafe 唔多人，可能因為唔太近市中心，附近又無幾點或者BTS 可以搭，但係記住留意佢開放時間。浣熊參觀時間係1pm 打後！
除咗玩浣熊之外，呢間cafe比一個好夏日嘅風格，所以係港女打卡嘅好地點！除咗玩浣熊，呢間cafe 仲有嘢飲同埋甜品提供，兩樣都好好味！
玩完浣熊就去咗離pool time cafe 大概10分鐘距離嘅 big dog cafe。顧名思義，呢間cafe 係以狗為主嘅。類似浣熊cafe，big dog cafe 都係有入場費，同埋比你玩大概2個鐘狗，玩都你眼都花。佢啲狗係一輪輪咁放出黎，每輪大概會有4-5隻狗度，有大有細，但係比例上，呢間cafe有好多大狗。
全部狗都好friendly，唔怕人。如果你係一位愛狗之人，去呢度玩狗應該會好開心！
夜晚就到 Ratchada Roi Fai Night Market，中文叫火車夜市。
其實曼谷自己都有好多夜市，咁點解有特別去呢一個夜市呢？火車夜市賣嘅食物同埋衫都比較平同埋地道。如果你係一個好注重衛生嘅人，我就唔會建議你去。但係如果你想品嚐下曼谷嘅地道風味，去呢度食個晚飯係一個唔錯嘅選擇。
食飽飽，之後可以去對面嘅停車場，大概上到4樓度，係嗰一層可以由上面影火車夜市，幾靚，好似呢張相咁。
第二照，晨咁早就起身，join咗個local tour 去水上市場（Damnoen Saduak Floating Market）。搭車大概用咗2個鐘先到。
個水上市場都幾特別，都有幾多嘢賣，但係唔知佢地點賺到錢，因為唔少舖頭都係賣類似嘅貨物。有賣畫，手信，衫，袋，串燒，椰子雪糕，粉麵飯都有。嗰度啲嘢唔係特別貴，但係我都剩係買咗啲野食當早餐。水上市場都真係幾大，咁樣遊一遊都用咗半個鐘。
係水上市場附近有個兩個temple，叫 Wat Bang Kung 同埋 Thai Boxing Temple。可以影下相，行下，但係唔係太特別。
之後就起行去美功鐵道市場（Maeklong Railway Market）。佢係泰國曼谷近郊區嘅一個小市場，都係最多觀光客朝聖嘅火車市集，最令人津津樂道嘅係睇住火車直衝傳統菜市場嘅震撼，好窄嘅小市集瞬間收檔，係嗰一刻覺得攤販好忙，要賣嘢又要被開火車，簡直係世界奇觀，曼谷獨有!
美功車站（Maeklong Station）一日得4班車，來回8個時段有火車經過，而當地傳統市場直接係車站延伸出去嘅一小段鐵軌。呢度算係早午市，如果你夜晚先黎參觀就體驗唔到火車穿梭市集嘅樂趣，想體驗真係要睇啱時間親自走一轉!
夜晚去咗另一個水上市場（Amphawa Floating Market），係呢日嘅最後一站。其實，我覺得呢度全部都係觀光客，不過因為可能呢度係好多曼谷人鍾意黎嘅地方，價錢仲算OK，食物選擇都幾多，尤其是係海鮮!
體驗水上市集嘅文化好有意思，有啲攤檔直接係船上面叫賣。
係呢個market 有提供 Firefly Night Cruising，比你出去睇螢火蟲。但係唔知係咪因為有燈定係因為啲引擎聲太大，嚇走晒啲螢火蟲。所以其實都係隱約見到一兩粒閃下閃下嘅嘢。唔可以話太特別，所以如果你有幸去睇螢火蟲，唔好抱咁大期望。
第三日照早去咗附近著名嘅餐廳食早餐，叫Ethos Vegetarian and Vegan Restaurant。一入到去全部都係外國人，同埋餐單全部都係素食，係素食者必去嘅地方！
係呢間餐廳附近就係 Khao San Road（考山路），但係考山路其實夜晚先有嘢睇。照早啲攤檔全部都唔開，酒吧都休息，照早basically 係無嘢開嘅。
好失望地，我就直接行過去 The Grand Palace，都行咗大概15分鐘。泰國曼谷大皇宮(The Grand Palace) 同埋玉佛寺(Wat Phra Kaew) 都係同一個地方，因為我地係外國人，所以要係特定嘅門口買門票，門票500泰幣，我覺得相對泰國嘅物價，佢啲門票都幾貴。但係見佢咁出名就參觀下。
先提提大家兩樣嘢，首先係玉佛寺同埋大皇宮指同一個地方，大皇宮包含住玉佛寺！進出大皇宮本來係唔可以著裸露衫，背心同埋短褲、涼鞋係唔可以入去嘅，要另外租借衫套上去。
打的士返市中心大概 20分鐘就到 Erawan Shrine（四面佛）。四面佛個位好細，但係有好多人。你可以去嗰度買花去拜或者放生。
係佢附近就有間叫 Little Zoo Cafe。呢間 cafe 比較少位，同埋無 time limit，so 我建議你搵啲少啲人嘅時間去。嗰度有各種各樣嘅動物，同埋價錢都唔係特別貴，有甜品同埋嘢飲。但係佢地啲甜品同埋飲品都偏甜。
動物就包括狗，貓，兔子，狐狸，浣熊，刺蝟，有各種唔同種類嘅動物比你任玩！如果係曼谷市中心，真係推薦要去參觀一下！
玩咗兩個鐘動物就去買手信返香港～曼谷啲商場都集中埋一齊，所以可以一次過行晒。但係大部分都賣比較high class，有牌子嘅嘢，就唔係好啱我。Siam Square One，Siam Paragon，Central World 都係大型商場。
我自己就去 Big C Supercenter 買野食做手信。呢個係一個大型嘅超級市場，可以係嗰度一次過掃晒啲手信。
因為係最後一晚，就諗住去一間比較high class 嘅餐廳食飯，去咗 Attitude。Attitude 可以睇到成個曼谷嘅夜景，啲野食又唔係超貴，但係又好好食，所以可以考慮去下！我叫咗個鵝肝雞薯蓉，真係好好食，薯蓉好滑，鵝肝好大舊，整得好入味。
食飽就去對面海嘅 Asiatique the Riverfront。呢個都叫做係一個夜市，但係比較整潔同埋唔係特別平嘅夜市。但係我鍾意呢個夜市嘅vibe，有少少似香港嘅黃金海岸。
最後一日，緊係去傳說中最好行嘅市集，Chatuchak Weekend Market，亦都叫JJ Market，翟道翟市集。既然叫週末市集，就姐係平日係唔開，要假期先可以去，基本上係星期五晚、星期六同埋日全日營業，其他時間就不好特登黎啦。
#寫出你遊歷 #hutchgo資助旅費1000蚊
