#寫出你遊歷 #hutchgo資助旅費1000蚊
好多人去旅行，都會覺得搭長途機係一件好辛苦嘅事，今次，因為我哥哥係喺加拿大嘅不列顛哥倫比亞大學讀書，所以就趁佢嘅暑假，我就飛咗過去加拿大嗰邊探一探佢。今次就等我為大家介紹下我認為溫哥華有啲咩值得去嘅地方，有啲咩好西食，同埋有啲咩係一定要買嘅。
當然啦，如果你哋係喺九月去嘅話，咁就記得睇加拿大嘅楓葉啦，不過今次我都撞唔啱楓紅嘅時節，亦即係九月底到10月中，所以就冇得睇啦。
我今次主要去嘅地方係溫哥華，探完阿哥之後，我都去咗多倫多幾日，不過今次嘅介紹咗都係圍圍繞返係溫哥華先。事不宜遲即刻同大家介紹下第一個一定要去嘅地方先啦。
卡皮拉諾吊橋
卡皮拉諾吊橋係世界最高嘅步行吊橋，佢喺十九世紀末期興建，係溫哥華最古老的觀光景點。
呢條橋起喺卡皮拉諾河上面，呢條橋一開始只係用麻繩同埋木板嚟起，後尾先加返繩索之類。
除咗吊橋之外仲有一個cliff walk，如果你哋係畏高嘅話，又或者好驚嘅，就真係唔好行出去啦，我喺上面都見到唔少人因為腳軟，攤左係度郁都唔郁，唔想俾人笑嘅話，就首先衡量下自己嘅膽量先行上去啦，呢個景你可以睇晒兩旁嘅雨林，而企係高處嘅快感就更加唔可以用文字來形容，嗰種宏偉你真係要親身體驗過先知。
仲有呀仲有呀，呢度有一個一定要體驗嘅項目叫做樹梢冒險，佢就係由七座大橋連接着八棵樹，你可以企喺嗰啲吊橋上面欣賞下嗰啲樹嘅紋理，仲有一啲你喺地下係睇唔到嘅細節添。
卡皮拉諾吊橋距離溫哥華市中心只有 30 分鐘車程，詳細地址同車嘅時間表可以睇番https://www.capbridge.com/visit/shuttle-service/。你都可以搭232/236/247巴士，價錢方面，成人嘅門票係35.95加元， 65以上嘅長者係33.95加元，而學生嘅話就係29.95加元，青少年就係22.95加元，兒童就係12加元，但係如果你係六歲以下嘅兒童嘅話呢，就唔使俾錢啦。仲有呀，呢度唔係全偉開放架，（開放時間：1月4日至3月13日9:00-17:00；3月14日至4月25日9:00-18:00）
煤氣鎮(Gastown)
煤氣鎮可以話係溫哥華嘅發源地，佢仍然保留着好古老嘅面貌，煤氣鎮之所以叫做煤氣鎮，唔係因為呢度出產煤氣，而係因為溫哥華第一任市長嘅花名Gassy而命名。
煤氣鎮最著名嘅地標就係嗰個蒸氣鐘，佢亦都係世界上第一座有蒸氣推動嘅時鐘，如果你好彩嘅話，就會見到呢個蒸氣鐘嘅頭頂會冒出啲白色嘅蒸氣，同時亦都會奏住好好聽嘅世界名曲。
煤氣鎮嘅楓樹廣場仲會見到一個銅像，而呢個銅像嘅主角就係呢個煤氣鎮嘅發起人Gassy先生，呢個真嘅居民，就係起咗呢個銅像黎記念佢對呢個鎮嘅發展嘅貢獻。
呢度仲有唔少嘅古董店，紀念品店，畫廊，同埋一啲咖啡店餐廳酒吧等等，瀰漫着19世紀舊溫哥華既嗰種古典氣息，仲有淡淡舊歐洲韻味，喺呢度整返杯咖啡真係可以chill成日。
由市中心行過嚟都只係5分鐘，你亦都可以搭1號巴士，喺Water Station站落車。
史丹利公園 Stanley Park
史丹利公園雖然就叫做公園，但其實已經大到好似一個島仔啦，唔講唔知，呢個公園入邊仲有一個水族館，不過今次我就冇時間入去，所以都唔可以為大家介紹啲乜嘢，有興趣嘅就自己入去啦。我哋今次主要嘅活動範圍係東面，所以西面我哋就冇乜點行啦。
公園周圍都係一片綠色嘅草地，周不時都會見到啲小動物，佢哋已經唔係好驚人，我哋行緊埋去影相嘅時候，佢哋都冇乜點樣避。
呢度周不時仲有啲馬車行添。
如果你哋好彩嘅話，仲可能見到有人喺呢度舉辦婚禮添。所以，我認為史丹利公園真係一個好適合人哋出嚟散步，踩單車，影相，甚至係舉行婚禮嘅地方添。
交通方面，大家可以搭巴士19號， 240號， 241號， 242號， 246號，247號， 250號， 253號， 254號， N24號係St NS Gilford站落車。
加拿大廣場 Canada Place
加拿大廣場係溫哥華嘅地標之一，成個建築用咗五塊玻璃纖維製成嘅白帆布作為巨形帳幕。入面呢就有會議中心，碼頭，商店，酒店同埋一個劇場（係全球首座永久性IMAX 3D戲院）。唔講唔知，呢度仲有水上飛機比你玩，你可以沿著條海岸線行翻一圈添。Canada Place就係skytrain嘅最後一站waterfront，又或者搭巴士1號、22號、23號、35號都得。Canada Place夜晚會係白帆上面都會打燈，仲會變換樣式同埋燈光。
野食
終於嚟到嘢食啦，喺加拿大最出名嘅梗係冬甩啦，冬甩被譽為烘培界魔戒，係德美甜品入面最為人熟悉同埋受歡迎嘅其中一種甜品，今次我就介紹喺溫哥華兩間一定要食嘅冬甩鋪頭，如果你係鍾意食甜品嘅話，仲等咩呀，即刻錄落去睇啦。
Cartems Donuterie
呢間鋪頭嘅招牌動物就係佢嘅甜甜圈公仔，呢度嘅冬甩嘅設計都好有創意，仲有唔少女仔都鍾意嘅玫瑰花茶葉等等嘅款式，一邊嘅座位都唔係好迫，叫番杯咖啡絕對係可以坐返半日嘅。
地址：534 West Pender Vancouver, BC
營業時間：
星期一至四: 7am-8pm
星期五: 7am-10pm
星期六: 10am-10pm
星期日: 10am-6pm
Swiss Bakery
呢間鋪頭嘅冬甩，同我哋平時想出嘅冬甩嘅樣係有啲唔同，佢係用鬆脆口感嘅法式千層麵包嚟整成冬甩咁樣嘅外型，如果你係鍾意食麵包嘅話，呢個鬆脆彈牙嘅口感更加令你一試難忘，絕對推薦又鍾意食麵包又鍾意食甜品嘅你。呢間鋪頭仲會根據季節而推出季節限定嘅口味，例如秋天佢有出過一個叫做肉桂南瓜嘅口味
地址： 143 E 3rd Avenue, Vancouver, British Columbia V5T 1C7, Canada
營業時間：
星期一至五：7am—6pm
星期六:8am—5pm
介紹完甜品，我都為大家介紹下溫哥華一啲比較出名嘅餐廳，大家可以按照自己嘅口味去試。
Flying Beaver Bar & Grill
呢間係一間起河邊嘅餐廳，除咗有靚景睇之外，呢度周不時都有水上飛機起飛同埋降落，大家可以一路食嘢一路欣賞，如果嗰日天氣好，大家仲可以坐喺戶外吹住海風咁樣食嘢，呢度星期六日仲會有音樂表演。呢度最出名嘅食物就係Poutine，佢可以話係好代表到加拿大嘅一種食物，主要來講係一啲炸薯條上面林左啲芝士同埋肉醬汁。
Cheese cake etc Vancouver
係呀係呀又係甜品呀，呢間應該係溫哥華最出名嘅芝士蛋糕，呢間雖然係好出名嘅鋪頭啦，但係佢淨係開夜晚嘅，咋都真係幾大牌下。
春秋火鍋Landmark
溫哥華其實都有好多唔同地方嘅嘢食，佢哋都做得好出色，例如香港嘅雞蛋仔，越南河粉其實溫哥華都有得食，如果你去到溫哥華，而又好想打邊爐嘅話，咁你就要來呢間春秋火鍋，佢係由夜晚五點鐘開到凌晨兩點鐘，呢度嘅牛肉好新鮮，亦都有港式麻辣湯底，當然唔少得丸，豬紅同埋海鮮，不過呢度唔係任食，而且單點嘅價格都比較高，唔係呢度食嘢可能就會大出血啦。
Pajo’s Fish & Chips
呢間鋪頭係專食英國嘅炸魚薯條，同英國嘅味道其實都差唔多。
手信
去旅行梗係要買番啲手信比啲親戚朋友啦，今次就介紹下溫哥華一定要買嘢手信。最常見嘅加拿大手信就係冰酒，楓糖，魚油，維他命等等。
楓糖系列商品，例如楓糖漿，楓糖餅，楓糖茶，楓糖朱古力，其實係普通嘅超市藥房或者紀念品鋪頭都會買得到。我今次要介紹嘅同埋推薦嘅楓糖夾心餅就係呢隻Dare，呢個餅乾食起嚟好香脆，而且楓糖味好突出，好清甜，如果配埋茶或者咖啡，就會減低種油膩嘅感覺，價錢方面就係$5兩盒。
加拿大冰酒
冰酒簡單d黎講，就係係低溫下採摘冰凍嘅葡萄，之後再壓榨成汁而成嘅葡萄酒，
而一支加拿大冰酒都一定要符合VQA嘅規定，所以係買加拿大冰酒個陣記得要睇清楚上面有無VQA嘅字樣。我今次要介紹嘅同埋推薦嘅加拿大冰酒 ICEWINE （$76），我覺得佢比較易入口，所以就買左。
維他命D雜 （$6-11）
呢個絕對係買比屋企人最佳嘅手信，唔少上咗年紀嘅人，就好似我嘅爸爸媽媽咁，其實好多時都要食一啲維他命，不過由香港代理嘅維他命其實都好貴，所以今次去到加拿大就買咗幾盒返嚟，價錢有平有貴，最主要都係睇吓你買幾多粒同埋你嘅品牌，你可以去一啲溫哥華嘅藥房買，或者你臨走嗰陣係機場買都得。
