小篇今年都去咗好幾次日本，去過沖繩、廣島四國、東京、福岡，嚟到六月正值花開旺季，梗係要慕名去薰衣草田玩吓啦！可惜網上嘅遊記好多都係自駕遊，而我又未有國際車牌，唯有用當地交通傲遊北海道！
Day 1 (23/6)香港- 台北- 名古屋
航班：香港國際機場(HKG) – 臺灣桃園國際機場 (TPE)
臺灣桃園國際機場 (TPE) – 名古屋中部國際機場(NGO)
時間：5hr 50min
因為航班要喺台北落一落機所以總共要搭5hr 50min先到名古屋
坐0850早機，晨早留留要到香港機場，仲要坐早機，飛機餐都唔慌飽啦！所以識玩一定係帶埋信用卡，拎埋機票入plaza premium lounge食早餐啦:P 當然唔少得呢碗魚蛋粉，望見都流晒口水喇！
食飽就上機訓陣嚕Zzz……
飛左一個鐘鬆啲話咁快就到台北桃園機場，因為要清機緣故所以比人趕咗落機過安檢等上機。雖然成個轉機過程都係15分鐘左右，但梗係唔好晒咗呢個機會，一於再入台北間plaza premium lounge再食過，哈！
香港間lounge就出名食魚蛋粉，嚟到台北，梗係唔少得肉燥飯啦！
唔好睇佢賣相平平無奇，食完真係番尋味！食飽又趕上機，睇多套戲就差唔多落機嚕！
一到埗就坐名鐵特急出名古屋駅市區，轉車去到榮站再去dormy inn擺低行李。酒店會住2晚。
休息一陣就去咗榮站嘅Central Park同埋Oasis 21廣場周圍行吓。
晚飯去咗食德兵衛，係間又高質又平嘅迴轉壽司:P 店內都見到好多香港人，睇嚟呢間野都幾得香港人鍾意！最後2個人食左3800円左右就捧住個肚去埋單嚕！
食完晚飯去咗附近間驚安之殿堂買吓零食手信，又去咗名古屋電視塔附近散吓步咁，幾寫意！不過我就無上到去電視塔，唔知道上去睇夜景會係點樣嘅呢？
Day 1總結：
早餐：HKG Plaza Premium Lounge
午餐：TPE Plaza Premium Lounge
晚餐：德兵衛(人均1500-2000円)
住宿：Dormy Inn (人均HKD$378)
Day 2 (24/6)名古屋
尋日又早起又坐咗成日機，呢日訓晏少少11點先出門。
朝早去咗名古屋駅搵拉麵，味噌湯底好入味，食到最後有少少咸但係值得一試！
然後就出發去名古屋城，逛逛城內周圍感受宮殿堂皇氣派，如果遇上周末或者節日嘅話，仲可以係二之丸廣場欣賞織田信長、德川家康等戰國武將嘅真人扮演！
睇完名古屋城都3點幾嚕，坐返出去名古屋駅行街shopping！名古屋駅周邊都係購物商圈，有名鐵百貨店、近鐵Passe、JR gate tower，當然唔少得Bic Camera啦！仲可以去地下街搵搵嘢食，當係下午茶填吓個肚又得！
行完商場臨近傍晚，一於就追住個夕陽睇日落！睇日落地點極力推薦榮站外面Oasis 21嘅水の宇宙船！免費入場之餘人流唔會太多，場內水池播放輕鬆音樂，但係上面仲可以望到日落背景嘅電視塔，望見咁靚嘅景幾咁令人陶醉呀！
睇完日落肚餓了，去噚日間驚安殿堂附近嘅じゃんじゃん亭食燒肉放題，店內用智能平板點餐，咁就唔怕言語不通嘅問題啦！
Day 2總結：
午餐：力丸拉麵(人均1000-1500円)
晚餐：じゃんじゃん亭栄店(人均2700-3000円)
住宿：Dormy Inn (人均HKD$378)
Day3 (25/6)名古屋- 札幌
第三日係舟車勞頓日，但如果唔怕chur嘅話仲可以去埋熱田神宮欣賞祭典活動！
朝早起身執埋行李check out 搞搞吓就11點了，喺酒店附近搵到間食傳統會席料理嘅太閤本店，賣相唔錯，不過味道普通，不過不失咁啦！
食飽就搭去名古屋駅再坐返出機場，準備飛去札幌啦！
航班：名古屋中部國際機場(NGO) – 札幌新千歲機場(CTS)
時間：1hr 40min
一到新千歲機場已經即刻感受到北海道嘅涼意！名古屋上機明明仲係28-29度，呢度落機即刻降到18度！拎完行李就去JR遊客服務中心買定JR交通車票。因為嚟梗幾日會去札幌、小樽同美瑛，三地相隔都有一段距離，但又未至於要去買JR pass，所以原本想買四張單程車票，最後去請教職員點買最抵！
去到咁啱有個識講廣東話嘅職員當值，講完我地嘅行程之後佢推介咗我地買「富良野．美瑛鐵路車票」。車票票價6500円，比起買單程車程慳咗4000幾円！ 呢張車票玩法包含車票A同車票B，車票A係比你由札幌入閘，上特急JR自由席搭去旭川，然後轉富良野線出閘。
車票B就包你喺自由乘降區間列車無限次乘搭自由席，即係無限次來回旭川<->美瑛<->富良野。而車票B亦都包含一次單程回札幌，即係旭川返札幌嘅特急車自由席。除咗呢張車票之外仲有好幾種優惠車票比唔同行程安排嘅遊旅客，所以大家去美瑛富良野睇薰衣草花田嘅話記住要去JR中心問問呢啲優惠車票喇！
另外仲買咗張來回札幌<->小樽嘅JR車票，喺Day 4, 5來回小樽會用到嘅！
買完車票之後坐JR快速機場線出札幌市區，再轉地鐵去中島公園駅附近嘅Vessel Inn Sapporo擺低行李，住一晚。
到酒店擺完行李已經開始天黑，係時候食晚飯喇。嚟到北海道又點少得食蟹呢！
膽粗粗咁去咗えびかに合戦(蝦蟹合戰)食蟹宴放題，因為第一次試，所以叫咗個7500円嘅放題餐，呢個餐包括原隻毛蟹、皇帝蟹腳、松葉蟹腳、蝦天婦羅、蟹腳天婦羅、蝦壽司、蟹壽司、蝦天婦羅壽司同埋茶碗蒸！
一睇就知成個放題嘅重點係毛蟹、皇帝蟹腳同松葉蟹腳啦！所以壽司天婦羅果啲真係食1 round就夠，不過蟹腳天婦羅幾特別，都值得一試嘅！
皇帝蟹腳勁粗，多肉到一啖都食唔晒，好juicy！至於毛蟹，肉唔多，但勝在蟹膏鮮甜！最正嘅一定非松葉蟹腳莫屬啦！蟹腳都好粗，而且好易就拆到蟹殼，所以成晚基本上主要係食松葉蟹嘅！
呢盆蟹要食晒先可以refill，總共食咗3 round已經飽到上心口……成世人第一次食咁多蟹仲要咁好食，真係痛快！
Day 3總結：
午餐：太閤本店伏見店(人均1500-2000円)
晚餐：えびかに合戦(人均7000円)
住宿：Vessel Inn Sapporo Nakajima Park (人均HKD$318)
Day 4 (26/6)札幌- 小樽
嚟到北海道行程變返緊湊啲，9點鐘出門口checkout寄存行李，然後就去二条市場食個豐盛早餐！
去到二条市場先去「大磯」食海鮮丼填飽個肚，除咗海膽鮮甜之外，值得推薦嘅係味噌燒銀鱈魚，嫩滑多汁，搭配味噌淡淡咸香，而家諗返起都流口水！
食完海鮮丼，又點少得食雪糕呀？大磯收銀處都有自家製軟雪糕賣，奶味濃郁雪糕滑，不過見咁多人排隊，所以買完出門口食！
行行吓見到一檔賣夕張蜜瓜，可以坐入店內食，蜜瓜肉腍甜到爆，一定要試！
填飽個肚之後就去探索札幌，喺市區周圍逛逛，由大通公園影完札幌電視塔開始，經札幌市鐘樓，行去北海道廳舊本廳。
行到咁上吓開始肚餓，去雪印パーラー(雪印Parlor) 食北海道最頂級嘅雪糕，極力推薦雲呢嗱味芭菲，雪糕入口即溶，濃醇綿滑，實在太好味，所以最後回程返嚟北海道又食多次！
食完之後狸小路商店街行街，呢條大街集合飲食、藥妝、服飾、娛樂於一身，好啱遊客行架！
行完之後就出返酒店拎行李去札幌駅，搭JR函館本線去小樽～
去到小樽Hotel Torifito Otaru Canal安置行裝住返一晚。擺埋行李就去壽司醫吓個肚，小樽市海產豐盛，當地嘅壽司店林林總總。最後俾我地搵到間迴轉壽司和樂，選擇多，海產新鮮得嚟價格相宜，店內有唔少本地人排隊，不過廣東話都不絕於耳，睇嚟呢間壽司店都幾受香港人歡迎！
食完之後喺小樽市區周圍逛逛，最唔少得當然係小樽運河，感受吓小樽嘅浪漫氛圍。然後返酒店浸個熱溫泉，疲勞盡消！
Day 4總結：
早餐：二条市場大磯(人均3000円)
午餐：雪印パーラー(人均1000円)
晚餐：迴轉壽司和樂(人均1500-2000円)
住宿：Hotel Torifito Otaru Canal (人均HKD$481)
Day 5 (27/6)小樽- 美瑛
晨早起床又checkout寄存行李嚕。今朝早餐嚟到三角市場覓食！
三角市場只有一條直街，直行2分鐘其實已經行完。行到最尾綱岸水産個老闆招手歡迎，向我地介紹店內最鮮活蟹！有帝王蟹、松葉蟹、毛蟹同花咲蟹。前日食過蟹放題已經食盡帝王松葉同毛蟹喇，所以今次一於試食花咲蟹。
由於呢檔同さんかく亭有合作，所以我地揀完蟹之後就叫我地去さんかく亭等20分鐘。
當然，肚餓嘅我地喺店內都叫咗魚生飯、燒貝同燒銀鱈魚，水準都唔比大磯差喎！
食完飯就啱啱煮好蟹，開動！花咲蟹肉唔算多，但食落非常鮮甜，蟹膏一啲都唔腥，食完仲飲埋剩低嘅湯汁精華，好滿足！
食飽就去堺町通行街，成條街有好多間店賣玻璃擺設飾物，同埋小樽獨有嘅手信。
行到中間入咗間拉麵店(ラーメンみそら)充充飢，店內牆上掛上Bigbang成員嚟幫襯之後嘅親名簽名海報，難怪店內有唔少韓國遊客幫襯！
食完之後去LeTao嘅旗艦店睇吓手信，肚仔仲有空位可以坐低食個蛋糕，同埋買手信返香港！
堺町通行到尾去北一硝子館到此一遊，入面仲係用梗油燈照明，喺度坐低食個茶點都幾chill架！
行完之後返酒店拎行李去小樽駅，準備出發去美瑛嚕！
先由小樽搭JR去札幌，再轉JR特急去旭川，再轉車去美瑛駅。三程加埋都搭咗三個幾鐘……所以到埗都已經夜晚9點幾，咩舖頭都閂晒了。美瑛周圍都好靜，街上面幾乎一個人都無。
去Hotel Lavenir check in之後行返出去7-11買晚飯返酒店食。
Day 5總結：
早餐：三角市場さんかく亭(海鮮丼人均2000円，蟹另計價錢)
午餐：ラーメンみそら(人均1000円)
晚餐：7-11(人均500 円)
住宿：Hotel Lavenir (人均HKD$530含早餐)
Day 6 (28/6)美瑛- 札幌
Day6終於嚟到成個trip嘅行程重點，睇薰衣草花田！
晨早起床食酒店早餐，酒店buffet早餐都有幾多選擇，而且都幾高質！值得推介嘅係薯仔沙律同埋美瑛當地新鮮牛奶！今餐要食飽啲當係brunch，因為出富良野未必有時間再搵嘢食了！
食完早餐checkout 寄存行李。然後出發去睇薰衣草花田！由於6月尾仲未到薰衣草開花旺季，所以坐去薰衣草花田都只係見到一望無際嘅綠色草原～
但如果正值7月旺季嚟嘅遊客一定要睇準時間表嚟坐「富良野．美瑛慢車號」慢慢欣賞呢一大片嘅薰衣草海！仲有可以留多日踩單車遊拼布之路！
由美瑛搭到去ラベンダー畑駅落車，跟住人潮行到去富田農場，終於可以見到一大片薰衣草花海！除咗薰衣草之外，仲有其他唔同顏色嘅花種俾大家打卡！隔離仲有間店賣薰衣草味雪糕，比大家拎住雪糕打卡呃like！六月嚟已經咁靚，真係想像唔到7月旺季嚟係點既樣！雖然話唔係旺季，但係人潮都唔少，要搵個靚位影文青相都唔易架！
喺富田農場影完相，行去中富良野買張觀光車上山，飽覽呢整片富良野市！上到山轉左，會發現有一大片好少人留意到嘅薰衣草花園，終於可以瘋狂影相啦！
玩完薰衣草花田就要打道回府，攞齊行李坐返出札幌喇！
之前去過雪印パーラー食雪糕仲念念不忘，所以當日坐返出市區就衝返去食雪糕。當日仲要遇正6月28日係芭菲日，特定芭菲都係800円一杯，超抵食！
然後去Sapporo Park Hotel擺低行李住返晚。擺完行李都已經9點幾10點，最後一晚決定去食牛角燒肉放題！
日本牛角放題比起香港嘅多好多款，而且款式仲高級好多！最後揀咗個Deluxe放題餐食豪佢！
Day 6總結：
早餐：Hotel Lavenir酒店早餐
小食：富田農場雪糕(300円)
晚餐：牛角札幌駅前店(人均4500-5000円)
住宿：Sapporo Park Hotel (人均HKD$484)
Day 7 (29/6)札幌- 名古屋- 香港
最後一日主要都係回程返香港。
晨咁早checkout拎埋行李出新千歲機場坐返名古屋。新千歲機場大堂有極多間手信店，可以嘅話可以預早半個鐘至1個鐘嚟行吓買手信！然後就上飛機搭去名古屋了～
航班：札幌新千歲機場(CTS) – 名古屋中部國際機場(NGO)
時間：1hr 45min
到名古屋仲有多1個幾鐘先有得checkin，所以去機場入面間丸忠迴轉壽司食午餐，估唔到機場入面嘅壽司店水準都唔錯，價錢亦都唔高，推介！
航班：名古屋中部國際機場(NGO) – 香港國際機場(HKG)
時間：4hr 10min
返到香港又肚餓啦……梗係唔好晒咗最後呢次機會入lounge啦！只要你拎住回程機票同埋相應嘅信用卡，就可以去埋Terminal 2間plaza premium lounge食多餐晚飯，為呢個旅程畫上完美嘅句號！
Day 7總結：
午餐：丸忠迴轉壽司(人均2000-2500円)
晚餐：HKG Plaza Premium Lounge
#寫出你遊歷 #hutchgo資助旅費1000蚊
