早幾年香港三門仔大美督曾經有個新聞 話果頭突然出現大量藍眼淚夜光藻
可惜因為當年唔係香港所以無機會去朝聖
上網一尋之下 發現原來呢個藍眼淚
係台灣馬祖列島 每年4至8月都會大量出現
所以今年AL留左幾日假就係黎呢度朝夜光藻聖啦！
要去馬祖列島睇藍眼淚 除左天時地利人和之外
最重要就係睇你運氣 好幸運地今次去馬祖天公造美 真係不枉此行呀！
交通方式：
馬祖列島係台北市嘅西北方
坐飛機大約一個鐘就到 而坐船就要八個鐘
所以坐船嘅話 建議坐過夜船去 訓醒就可以落船起程架啦！
Day 1 南竿 – 北海坑道
南竿嘅北海坑道係其中一個追淚嘅熱門景點 坑道入面相當壯觀
黎呢度參觀要先係網上預約 但經常爆滿 所以我地選擇左現場候補位置
成個旅程30分鐘 因為第一次去睇藍眼淚 所以心情又興奮又緊張呀！
講返藍眼淚夜光藻本身特性 佢原本係唔會發光嘅
但係受到外來刺激或者撞擊之後 佢先會發出藍螢光
所以旅程我地每人都派發左一支槳 只要用力攪拌啲水 就可以令藍光藻光啦
船長會一路掌駝一路同你講解藍光藻嘅特性同埋北海坑道嘅歷史
去到中間船長叫我地熄晒所有照明工具 果陣真係暗到連我隻手都見唔到！
出發之後 我地用力攪拌啲水 終於可以一見藍光藻嘅真面目啦！
不過特別嘅係 呢度見到嘅藍藻發光係白色為主
但係因為現場非常暗 所以用手機唔係好捕捉得到畫面
所以呢程船遊都建議大家用心欣賞藍光藻 因為要影相嘅話
仲有其他地方可以慢慢影嘅！
不過呢程船遊只不過係小試牛刀 黎緊兩日嘅先係重點！
Day 2 北竿 – 白沙港口
上圖就係北竿嘅白沙港口 係往返南竿嘅碼頭
黎到呢到一定要記住有個死角樓梯
大約係上落船附近背對住港務局果條梯 係睇藍光藻嘅聖地黎架！
黎到呢個死角梯 真係見到大量藍眼淚發梗光 成個畫面好夢幻呀！
但係因為正值退潮 所以覺得同藍眼淚仲係有啲距離……
後尾載我地船嘅船夫佢帶我地去港務局對出果條暗梯
發現呢個死角位擋住光源 好似個密閉空間咁 所以可以好清楚咁睇到藍光藻呀！
然後船夫帶我地行落去暗梯
(其實好危險架！無當地人陪同真係唔好自己走落去！)
因為退左潮所以平台露出水面 我地企係平台上面踢水 就影到以下呢張相啦！
可想而知當時我處係現場係幾咁震撼！
後尾船夫要準備離開之前 仲話可以特登幫我地開船沖過藍光藻 刺激佢地發光
佢打左個圈之後就出現左呢個藍光藻圈 上圖係用長曝光影到架船嘅路徑 真係好靚！
可以見到咁光咁靚嘅藍光藻真係無憾了！
Day 3 北竿 – 白沙港口 & 馬鼻灣
第三日我地再返去白沙港口
發覺琴日條暗梯嘅同一個位置 多左好多藍眼液
比琴日仲清晰好多 藍藻發光完全可以清晰睇到條梯嘅結構添！
然後船夫帶左我地去馬鼻灣 發現每一個浪花都發出幽幽藍光
真係好治癒呀！！！！！！！
入夜潮退之後 因為藍光藻停留左係沙灘上面 所以我地行嘅每一步都發出藍光
想像下 頭上滿天星星 佈滿白光 腳下滿地藍藻 偏地藍光
成個感覺好虛幻好唔真實 但又真係發生左係我面前
係我呢世人見過最浪漫嘅景觀呀！
(好可惜用相機捕捉唔到 真係要親身去經歷先知道有幾浪漫呀)
總結:
久仰大名嘅藍眼淚 終於可以比我見到喇！
靚嘅程度真係唔係平日所見嘅景觀咁簡單～
係北海坑道果陣見到嘅係發白光嘅藍光藻
用槳攪拌可以見到一粒粒白色嘅藻 好似天上嘅星星跌左落水咁！
而係港口暗梯同埋馬鼻灣見到嘅更加唔真實
每次見到浪花撞擊 就見到一粒粒發出藍光嘅藻
事實上我相機影出黎嘅藍光同現實見到嘅仲有啲距離
因為肉眼睇嘅話好明顯係見到一粒粒嘅藍光藻
但因為相機曝光影出黎捕捉到嘅藍光藻已經融合埋一齊
所以會好似見到藍色鬼光咁嘅感覺 而動態嘅浪花就有藍海嘅感覺喇！
講到底 其實唔親身黎見到藍光藻 你都唔會感受到佢有幾咁嘆為觀止呀！
所以下次大家plan黎台灣玩 不妨可以留意埋呢個藍光藻朝聖地 馬祖列島呀！
#寫出你遊歷 #hutchgo資助旅費1000蚊
