適逄女友生日跟我同月，佢興高采烈提議去個快閃birthday trip，慶祝二人生日，所以立即向公司請假，決定趁機俾個驚喜佢！ 至於有何驚喜，稍後開估。
DAY 1
機票於hutchgo 訂了香草航空機票，早一個月先訂，連行李都係$2000左右一個人，算係唔錯！ 出發坐凌晨機，好處是放工返屋企食個飯、沖完涼出發機場剛剛好，上機立即開始訓覺，訓醒起身已經人在日本了！
出到市區酒店放低行李，稍為整頓一下，就出去食我的生日午飯了。第一站去森美介紹嘅立食牛扒IKINARI steak いきなりステーキ，可以自選唔同產地嘅牛，例如国產牛 (即日本牛)、美國安格斯牛等，再同店員講大概要幾多gram，佢就會即場切俾你，上磅收錢，再拎去燒！
登登登登！呢個係我份434g steak，熱辣辣，大大份，都唔駛3000 yen！
正值秋季，食完飯就去參觀明冶神宮的銀杏大道，兩旁金黃色的銀杏大樹閃閃發光，十分壯觀，加上藍天白雲，不過如果人少啲影相就更靚了！
女友的東京之旅checklist 之中有幸福Pancake 幸せのパンケーキ，原來要大排長龍先食到！於日本餐廳排隊通常都會用留名的方式排隊，我們用片假明寫下英文名字，要比心機留意服務生叫名，足足等了一小時呢。終於食到鬆軟pancake，食到幸福肥！
DAY 2
第二天一早到築地市場走走，食個新鮮刺生飯 (朋友問點解唔食 Omakase，又係喎！下次再食過！) ，仲周圍邊走邊食 (注意: 日本人覺得邊行邊食野好無禮貌架，所以雖然係「邊走邊食」，記得買完野係企定定食呢)
再出發到新宿御苑賞楓！新宿御苑就好似維園咁，市區中的一點綠，不過紅葉季節到訪，當然想睇佢「滿江紅」啦！
仲有唔同嘅庭園賞玫瑰花
晚上到了澀谷公園睇青の洞窟，臨近聖誕東京有唔少賞燈飾嘅地方，選擇去青の洞窟係因為佢感覺好浪漫，以藍光為主題，情侶散步100分！
DAY3
出發河口湖！一早(其實都已經中午，哈哈) 出發到新宿高速巴士總站，買個早餐就上巴士，車程大概1小時45分鐘，直達河口湖站。
今次住的旅館訂了望到富士山的房間，但去到竟然天陰陰睇唔到座山！ 女友同我都好失望，但都無辦法啦，趁未食晚飯，唯有散下步好好享受周圍風景。
沿住湖邊去到「紅葉迴廊」碰碰運氣，不過由於已經12月了，而且河口湖天氣比東京市區凍一截，紅葉都跌得七七八八，周圍亦都一個人都無！
回到旅館就係晚飯時間，到餐廳用膳，係12道菜嘅懷石料理，雖然食過更好味嘅，但係呢個都唔錯唔錯俾8分啦！
晚飯後稍為休息一下，我地就各自分開去男湯女湯浸溫泉。女友一向都會慢慢浸，而我就打算快快趣浸下，就返房準備更重要嘅事！
今晚12點就係女友生日，今年嘅生日驚喜，係求婚呀！ 由女友提出去呢個birthday trip 開始，我就即刻有呢個念頭，要喺富士山下同佢求婚，而今個trip 我亦一如以往做旅行free rider，咩都比佢plan，不過就係因為咁，我先可以係佢完全估我唔到之下求婚！雖然呢個求婚計劃其實無咩計劃可言，最大挑戰亦都只係唔俾女友喺我行李裡發現戒指 (出發前佢曾經「檢查」過我行李，好在有驚無險！) ，浸完溫泉入到房，就開始rehearse 一下台詞，準備12點拎出介指！
(下刪一千字肉麻求婚過程) 就係咁，簡單二人世界嘅求婚，女友一聲say yes，我就榮升女友的未婚夫啦！而呢個時侯，出露台望望，雖然好凍，但有滿天星星，好啱feel而我地兩個都興奮到訓唔著！
而第二日起身，你估見到咩? 富士山呀！係富士山！ 出返黎啦！
完美嘅天氣配合完美嘅景色，食埋個靚早餐，我地就出發去附近嘅天上山公園，繼續喺富士山下留下我地嘅腳毛！
由於回程係夜機，所以即使最尾一日亦有充足時間由河口湖返東京市中心，拎返寄存咗喺車站嘅行李，再出發機場返香港。 4日3晚嘅旅程真係玩到盡，由於頭尾兩日都幾乎有full day，所以去4日感覺去咗6日！ 下次希望同大家分享去honeymoon 嘅遊記。
#寫出你遊歷 #hutchgo資助旅費1000蚊
