一入到去行50步左右就已經見到豬仔啦, 佢地一見到我地黎都會衝埋黎, 知道我地會買奶奶比你飲嘛~~
平時自己飲得多奶奶啦, 但餵豬飲奶奶都係第一次, 雖然大家都係BB仔, 不過D豬都好大力下, 大人要幫手扶住支奶先唔會比D豬仔搶走
而幸晴就好專心望住豬仔飲奶奶, 好似真係明白自己做緊咩, 雖然佢既高度只係望到豬仔們既豬咀, 哈哈
餵完豬仔, 就行多少少路去睇山羊
山羊既力氣比豬仔更大, 所以我地餵左一陣就放棄, 都係返去搵豬仔, 哈哈
不過正當呢個時候, 幸晴突然間講左”咩咩”, 哇!!! 你知呢D係羊咩咩?!!! 自從果日開始, 佢依家就會時不時講咩咩啦! 雖然未必係次次見到羊先講, XDDD
牧場仲有兔仔同天竺鼠, 今次唔係餵奶啦. 係餵紅羅白, 所以一樣要捉實幸晴隻手, 怕佢一手鬆開, 支竹簽就吉親D小動物呀!
天竺鼠同兔仔身型幾乎一樣大~~
牧場入面仲有火雞!!!! 真係好大隻呀, D雞同埋火雞都係可以隨意係牧場入面走動架! D走地雞一定好好味!(誤….)
最後緊係要飲返支羊奶啦! 其實我係想食羊奶雪糕架, 只可惜去得太早, 未有得食…至於杯羊奶呢, 我覺得如果多幾個人SHARE會好飲D, 始終羊奶冇牛奶咁易入口呀!
老實講，個牧場俾我想象中細好多，如果情侶去既話真係唔建議去，但同BB去就係唔錯既選擇, 幸晴係呢度玩得超開心, 仲學識左個”咩”字喎, 真係黎得好值呀! 宜農牧場仲有DIY羊乳香皂同埋擠羊奶既體驗, 不過有時間限制架, 有興趣既記住上佢地既網頁睇清楚先啦
宜農牧場: https://goat.efarming.org.tw/supergood/front/bin/home.phtml
原文轉載自: https://wow.esdlife.com/space.php?uid=63794&do=blog&id=282236
