其實宜蘭真係超級多親子既民宿同酒店, 不過最終我都揀左親子溫泉酒店而放棄左民宿, 因為民宿入面既設計同埋DIY玩意, 個人認為比較岩大DD既小朋友玩, 幸晴呢個年紀去住都係浪費, 不如住間爸爸媽媽同幸晴都”SOFU”既酒店啦!
好快就有左心水 — 長榮鳳凰酒店(礁溪)
酒店位於宜蘭既礁溪, 揀果度除左係一出雪山隧道就差唔多到之外, 佢仲可以泡溫泉, 亦有一個溫泉水既嬉水池連BB都可以去玩, 仲有好多好多個主要原因, 雖然佢房價唔平, 但可以一泊二食, 我落機之後直踩去宜蘭, 之後係酒店玩到第二日十一點先走, 我覺得價錢算合理啦!!!
BOOK完房第二朝就會有酒店員工打比你確認房, 住客資料, 預約晚飯餐廳(佢有幾間揀)等, 因為佢要預備浴衣, 所以連BB幾大都會問下你, 而入住前一日佢又會再打比你確認多次, 咁貼心既服務真係好好呀!
而每日一到CHECK IN時間, 大堂都會有吉祥物出黎歡迎大家, 連幸晴訓左覺, 佢都照比個氣球我叫我比BB, CHECK IN完有專人一邊帶你上房, 一邊介紹酒店設施比我地, 仲幫幸晴爸預約埋裸湯, 不過裸湯只限大人玩, 幸晴爸等幸晴訓左先去, 我同幸晴都冇緣玩啦
酒店內提供既設施基本上都係可以食用, 例如生果
仲有雪櫃入面既飲品都係免費, 如果可樂多幾罐就好啦, XDDD
拖鞋除左係全新, 比我地係酒店入面用之外, 係可以帶走架!!! 幸晴果對唔知要等到佢幾大先著到呢…哈哈
去到放低仲訓得好林既幸晴係床度…..然後佢就訓左個幾接近兩個鐘…..有冇咁好訓呀張床! 終於都訓醒, 我地即刻同佢去兒童遊戲室玩
因為閒日既關係, 酒店設施基本上都係獨霸黎用, 有滑梯, 有廚房, 有籃球, 唔止幸晴, 連我地兩個大人都玩得好開心, 第二朝早又再黎呢度玩~~
仲有令幸晴爸雙眼發光既, 就係PS4!!! 不過佢發完光就算, 冇借黎玩
晚飯我地揀左自助餐形式, 除左魚生任食, 仲有麻辣火鍋, 炒雪糕, 酒店員工見到幸晴仲主動比左D豆腐花我地食, 幸晴今餐都係一齊食, 我又煮少餐糊仔 (佢食到蕃薯, 紫菜包飯, 蛋壽司, 粥, 菜, 豆腐花, 生果)
食飽又上返去兒童遊戲室玩多陣, 借左桌球黎玩, 幸晴唔會悶架, 事關佢見我地兩個打球佢就會笑到卡卡聲…….可能笑我地玩得差……..然後佢仲係桌球桌上面將D波用手放入洞, 不知玩得幾開心, 然後準時8點半返上房沖涼座奶等訓覺
當我仲擔心幸晴怕生保床之際, 佢已經熟睡左…….我估張床大過屋企果張都係主要原因之一, 啊! 好想買張返屋企呀! 雖然屋企唔夠大, HAHAHA
酒店除左提供BB床, BB浴盆之外, 仲有暖奶器同埋消毒機借用, 消毒機有烘乾功能, 我地大鄉里第一次用過後就愛上左啦!!!
幸晴爸襯幸晴訓左, 就去左泡溫泉啦, 而我亦都好寫意咁係床度睇康熙來了, 可惜呢個星期既康熙都好難睇….悶到呢…
話咁快又第二朝, 幸晴全晚冇醒過! 朝早起身仲要賴床!!! 哇, 有冇咁舒服呀!!!
然後我地去食早餐, 雖然幸晴已經飲左奶, 不過佢跟我地繼續食, 今餐幸晴食左炒蛋, 紫菜包飯, 香蕉, 西瓜汁(望住佢現榨冇落糖), 烚蛋同地瓜粥都有, 早知我唔駛煮定BB飯, 落黎呢度拎仲好啦!!!
食完早餐返上房換泳衣, 為左方便之後走唔駛帶太多濕衫, 我地唔著自己衫, 著左酒店浴衣落去, 有人著左浴衣好興奮!
照鏡仲要不斷望自己, 覺得自己好靚女咁
唔止HI自己, 之後仲有錫架…..真係比佢笑死我~~
最後衝次去玩水啦! 有室外同室內場, 我地去果日有微雨, 所以係室外場玩左陣都入返室內啦
連幸晴都岩浸既溫泉水就係按摩池度, D水唔係太熱, 比佢沖涼水黎講再凍多少少, 不過室內場唔怕會凍, 另外亦有其他唔同溫度既溫泉池, 同埋有魚仔食腳皮池添!
幸晴係按摩池點玩水? 就係….負責去禁掣….然後按摩就會開始, 然後….佢就會嚇親……哈哈哈, 明明岩岩嚇完, 佢下一秒停左按摩之後又好似唔記得左咁, 又走去禁掣…然後又嚇親, 我同佢就係咁樣玩左成粒鐘…..
之後上返房沖埋涼就準備閃LU! 其實11點CHECK OUT完, 職員仲同我地講, 可以繼續玩到夜晚架! 不過我地要去宜蘭其他地方玩啦, 真係好唔捨得呀! 最重要係….我地第一晚就住左呢間酒店, 之後果幾晚點算呀!!!嗚嗚嗚嗚嗚……
酒店地址: 26241 宜蘭縣礁溪鄉健康路77號
原文轉載自: https://wow.esdlife.com/space.php?uid=63794&do=blog&id=282227
