去到京都，當然唔少得去參拜一下神社啦。其中最為著名就一定係有千本鳥居的伏見稻荷大社。下午到達稻荷jr站，一出車站過一條街就見到神社的蹤跡。
之後都係做返一般遊客做嘅野，入去去神社同狐狸影吓相，扔下五円搖下啷啷，去本殿祈下福咁。走過左本殿，行多條樓梯，就見到千本鳥居。第一次見到咁多鳥居，都真係幾壯觀，之後上網睇返先知原來因為稻荷神社係祈求商業豐收個類嘅神社，所以啲商人就出錢起鳥居，當係祈福，起下起下就變成千本鳥居啦。但係要注意，千本鳥居都唔係我今次嘅重點。呢啲行野旅遊書都有得睇啦，所以都係去啲鳥居到影個相打個卡就算啦。
之後係啲鳥居中間行行吓，見到有隔離有有個牌仔，指示話原來山上面有另一個神社，叫伏見神寶神社。咁我嗰陣時諗，咁難得嚟到，梗係explore下唔同地方啦。所以我就脫離左人流，同旅伴一齊行左上條小徑上山。行咗一陣樓梯，就被竹林包圍，而且好似與世隔絕咁，完全聽唔到其他人嘅聲，同啱啱喺千本鳥居中穿梭個時遇到嘅人流有好大對比。行咗大概1分鐘，已經靜到可以聽到對方嘅呼吸聲。唔知係咪因為之前行咗一陣樓梯，所以有少少喘氣；或者可能因為周圍嘅氛圍都有少少恐怖，所以緊張到有啲攰。佢恐怖個位唔係你覺得會有野跳出來嚇你嗰種，而係當周圍啲人都好似消失晒，而你知道呢度本應係個旅遊熱點，箇中反差令人覺得好詭異。
佢擺喺度嗰個牌係水人嘅，又話行2分鐘就到，我行左2分鐘乜鬼都睇唔到，唔單止見唔到終點，仲見唔到起點。我冇計時，但係我覺得至少行咗4分鐘。途中其實如果有一兩個人，個感覺都幾世外桃源feel嘅；但係當一個人都冇，就唔叫世外桃源啦，係撞鬼feel啦。
當我終於到達神寶神社，第一樣令我注目嘅嘢就係佢個鳥車係用石造嘅，一睇就知好多年歷史。再行入去，見到左手邊有個counter，好似其他神社咁樣，好似有得賣御守，但係當我行過去，就發覺個counter係冇人嘅。係個時候發現，喺呢度真係完全冇其他人。如果你係超級旺季嚟嘅話，應該個觀感就會好啲嘅；但係我係嗰一刻，真係覺得幾恐怖，好似進入左一個唔同嘅空間，一個俾人荒廢左嘅地方咁。
好抱歉，我係成程路都冇影到相，因為好想快啲行到終點。而上到去神社都冇影到。平時我就唔係好信神怪個類嘅嘢，但係寧可信其有，不可信其無。平時都有了解一下日本文化，當中佢哋神社嘅文化係我覺得最引人入勝嘅，所以平時都有睇啲有關嘅資訊。我知道鳥居係神域同埋人界嘅一條區分線，一踏入鳥居，就入咗嗰個神嘅領域，所以唔可以做啲唔尊敬嘅嘢。我就唔知佢介唔介意人影相嘅，不過都係禮多人不怪啦。
我冇乜點再留意附近嘅嘢，睇返其他網上嘅遊記，好似係拜祭嗰個殿後面仲有一大片空地，但係我都唔係好知。我淨係知有好多地方掛咗一啲色彩好鮮艷嘅紙條，我唔知係咪籤文，或者係一啲祝福用嘅紙，我淨係知佢色彩咁鮮艷俾我感覺仲恐怖，硬係好似細路仔會做嘅嘢。守護呢個神社嘅，唔係狛犬，而係龍，左地龍右天龍。其實依家睇返都係啲好正路嘅，但係嗰陣時就覺得佢哋好似真係監視住自己咁樣。其實都係心理作用，不過人驚係咁㗎啦。我洗個手，洗埋個口，祈個福就走啦。呢次應該係我成世人最誠心祈福嘅一次。
下圖就係我行落嚟嗰時見到嘅情景，你可以幻想下係條小徑前行多幾步就一個鳥居都見唔到啦。而同時你都會好快聽唔到其他人嘅聲，你就大概幻想到個情景。
返返去千本鳥居嗰度之後，都就嚟黃昏啦，如果天黑應該真係無乜嘢睇，所以都係趁天未黑，就折返去稻荷神社本殿。諗諗吓好彩我早少少去到神寶神社，如果我去去下天開始黑，就真係會嚇到講粗口，因為沿途真係一盞燈都冇，其實如果想玩試膽大會，嗰度會係一個幾理想嘅地方。
#寫出你遊歷 #hutchgo資助旅費1000蚊
